Gwobrau Chwaraeon Conwy - Enwebiadau yn agor

Mae’r enwebiadau ar gyfer Gwobrau Chwaraeon Conwy 2025 ar agor

Mae Sir Conwy yn gartref i dalent eithriadol, gyda chystadleuwyr yn gwneud argraff ar lwyfannau cenedlaethol, rhyngwladol a hyd yn oed ar draws y byd.   Mae’r digwyddiad mawreddog hwn, a gynhelir bob blwyddyn yn Venue Cymru, prif theatr a lleoliad cynadledda Conwy, yn ddathliad go iawn o ymroddiad, angerdd a chyrhaeddiad mewn chwaraeon.

Am dros 26 mlynedd, mae gwasanaethau hamdden Cyngor Bwrdeistref Sirol Conwy wedi trefnu Gwobrau Chwaraeon Conwy, a luniwyd i gydnabod ac anrhydeddu pobl dalentog, clybiau, hyfforddwyr a gwirfoddolwyr yn y byd chwaraeon yng Nghonwy.  

Meddai Caroline Jones, Rheolwr Datblygu Hamdden Ffit Conwy: 
“O sêr ifanc y dyfodol i gystadleuwyr profiadol, mae’r gwobrau hyn yn dathlu’r rhai sy’n gwthio ffiniau rhagoriaeth yn eu camp ddewisol, yn ogystal â’r unigolion ymroddedig sy’n gweithio’n ddiflino y tu ôl i’r llenni i gefnogi clybiau ac athletwyr o un wythnos i’r llall. 

“Mae’n ddigwyddiad gwych a gynhelir yn Arena Venue Cymru, sy’n dod â thros 400 o westeion ynghyd, gan gynnwys athletwyr, noddwyr, a swyddogion gweithredol y Cyngor.  Mae 12 categori i gyd, a chyflwynir gwobr anrhydeddus i’r enillydd ar y llwyfan.” 

Dyma’r categorïau:

• Athletwr Iau y Flwyddyn
• Athletwraig Iau y Flwyddyn
• Tîm Chwaraeon Iau
• Gwirfoddolwr Ifanc y Flwyddyn
• Gwobr Llwyddiant Arbennig
• Athletwr Hŷn y Flwyddyn
• Athletwraig Hŷn y Flwyddyn
• Tîm Chwaraeon Hŷn
• Hyfforddwr y Flwyddyn
• Cyfraniad i Chwaraeon
• Gwirfoddolwr y Flwyddyn 

Cynhelir y digwyddiad, a ariannir yn rhannol gan Lywodraeth y DU drwy Gronfa Ffyniant Gyffredin y DU, ddydd Gwener, 21 Tachwedd 2025 am 7:30pm yn Venue Cymru, Llandudno.  

I enwebu, ymwelwch â Gwobrau Chwaraeon 2025 a chyflwynwch yr enwebiad erbyn 19 Medi.