Polisi Nofio gydag Epilepsi

Mae Cyngor Bwrdeistref Sirol Conwy yn gweithredu Polisi Nofio gydag Epilepsi sydd wedi ei ddyfeisio yn unol â chanllawiau gan y Sefydliad Siartredig ar gyfer Rheoli Chwaraeon a Gweithgaredd Corfforol (CIMSPA) a thrwy ymgynghori gyda sefydliadau epilepsi. Dangosir prif ofynion y polisi isod:

1. Gall unigolyn gydag epilepsi sydd wedi bod yn rhydd o ffitiau am o leiaf blwyddyn ddefnyddio pyllau nofio Cyngor Bwrdeistref Sirol Conwy heb unrhyw ragofalon arbennig.
2. Dylai unigolion gydag epilepsi nad yw wedi ei reoli ac na ellir rheoli’r cyflwr gyda meddyginiaeth a rhieni plant ag epilepsi nad yw wedi ei reoli ac na ellir rheoli’r cyflwr gyda meddyginiaeth geisio cymeradwyaeth eu meddyg teulu ar gyfer nofio a chymryd rhan mewn mathau eraill o chwaraeon, gan ystyried y canlynol: math, difrifoldeb ac amlder ffitiau; presenoldeb neu absenoldeb arwyddion o rybudd; a ffactorau sbarduno hysbys e.e. dŵr oer, straen, cyffro, sŵn (yn arbennig mewn pwll oer) neu oleuadau llachar ar arwyneb y dŵr.
3. Mae gofyn i unigolyn gydag epilepsi heb ei reoli neu eu rhiant/gwarcheidwad a/neu ofalwr roi gwybod i dderbynfa’r Ganolfan Hamdden ar ôl iddynt gyrraedd y ganolfan. Bydd Rheolwr ar Ddyletswydd wedyn, mewn partneriaeth gyda’r cwsmer, y teulu neu’r gofalwr yn cynnal asesiad risg o anghenion y cwsmer i sicrhau ymweliad diogel a phleserus.
4. Ni all nofio ddigwydd heb gydymaith dan unrhyw amgylchiadau.  Ni ddylai nofio ddigwydd os yw’r unigolyn neu eu cydymaith yn teimlo’n sâl.
5. Cydymaith yw rhywun a fydd yn gwmni i’r nofiwr sydd ag epilepsi nad yw wedi ei reoli a bydd yn ei oruchwylio’n barhaus o un ai y tu mewn neu’r tu allan i’r pwll; bydd ganddo wybodaeth ynglŷn â chyflwr epilepsi’r unigolyn a bydd yn gallu adnabod ffit. 
6. Pan fo cydymaith yn gwmni i’r nofiwr y tu mewn i’r pwll, bydd nofio’n cael ei gyfyngu i *ddyfnder sefyll y cydymaith. Bydd gofyn i’r cydymaith alw ar yr achubwr bywydau os yw ffit yn digwydd er mwyn sicrhau fod yr unigolyn yn cael ei achub mor gyflym â phosibl.
7. Os na all y cydymaith fynd gyda’r unigolyn sydd ag epilepsi heb ei reoli i mewn i’r pwll nofio, dylai’r cydymaith fod ar ochr y pwll gan oruchwylio’n barhaus.  Rhaid i’r cydymaith leoli eu hunain fel y gallant alw yn gyflym ar yr achubwr bywydau os yw ffit yn digwydd er mwyn sicrhau fod yr unigolyn yn cael ei achub mor gyflym â phosibl. Bydd nofio yn cael ei gyfyngu i *ddyfnder sefyll y nofiwr.

* Yn dibynnu ar ganlyniadau’r asesiad risg, fe all y Rheolwr ar Ddyletswydd ystyried caniatáu nofio y tu hwnt i’r dyfnder sefyll.

Dylai trefnwyr sesiynau wedi eu rhaglennu roi gwybod i’r ganolfan hamdden os oes gan unrhyw rai o’u haelodau epilepsi heb ei reoli.